സംസ്ഥാനത്തെ വിദ്യാർത്ഥി ബസ് കൺസെഷൻ പ്രായപരിധി 27 വയസായി ഉയർത്തി മോട്ടോർ വാഹന വകുപ്പ്.
നിലവിൽ 24 വയസായിരുന്നു.
കൺസഷനിൽ സഞ്ചരിക്കാനുള്ള ദൂരം 40 കിലോമീറ്ററായും വർദ്ധിപ്പിച്ചു.
സ്വകാര്യ ബസുകളിൽ കൺസെഷനെച്ചൊല്ലി വിദ്യാർത്ഥികളും ജീവനക്കാരും തമ്മിൽ തർക്കങ്ങൾ പതിവായ പശ്ചാത്തലത്തിലാണിത്.
രാവിലെ 6 മുതൽ വൈകിട്ട് 7 വരെ വിദ്യാർത്ഥികൾക്ക് കൺസെഷൻ നിരക്കിൽ യാത്ര ചെയ്യാം.
സർക്കാർ അംഗീകൃത വിദ്യാഭ്യാസ സ്ഥാപനങ്ങളിലെ വിദ്യാർത്ഥികൾക്ക് മാത്രമായിരിക്കും അർഹത.
ക്രാഷ് കോഴ്സുകൾ ചെയ്യുന്നവർക്കും പാർട്ട് ടൈം വിദ്യാർത്ഥികൾക്കും ഈ ആനുകൂല്യം ലഭിക്കില്ലെന്നും മോട്ടോർ വാഹന വകുപ്പ് വ്യക്തമാക്കി.
കൺസെഷൻ വിതരണത്തിലെ സുതാര്യത ഉറപ്പാക്കാൻ ഇനി മുതൽ നടപടികൾ പൂർണ്ണമായും ഓൺലൈൻ വഴിയാക്കും.
‘MVD leads’ എന്ന മൊബൈൽ ആപ്പ് വഴിയാണ് വിദ്യാർത്ഥികൾ കൺസെഷനായി അപേക്ഷിക്കേണ്ടത്.
ആദ്യ ഘട്ടത്തിൽ വിദ്യാഭ്യാസ സ്ഥാപനങ്ങൾ ‘MVD leads’ ആപ്പിൽ രജിസ്റ്റർ ചെയ്യണം.
മോട്ടോർ വാഹന വകുപ്പ് പരിശോധന നടത്തി ഇതിന് അപ്രൂവൽ നൽകും.
വിദ്യാർത്ഥികൾക്ക് ആപ്പ് വഴി കൺസെഷനായി അപേക്ഷിക്കാം.
വിദ്യാർത്ഥി അപേക്ഷിക്കുന്ന സ്ഥാപനത്തിന് ആപ്പ് വഴി തന്നെ ഇതിന്റെ അറിയിപ്പ് ലഭിക്കും.
അപേക്ഷകൻ അവിടെ പഠിക്കുന്ന വിദ്യാർത്ഥി തന്നെയെന്ന് മോട്ടോർ വാഹന വകുപ്പ് പൂർണ്ണമായി ഉറപ്പുവരുത്തിയ ശേഷമായിരിക്കും കൺസെഷൻ അനുവദിക്കുക.