തിരുവനന്തപുരം : ഇന്ത്യക്കാരെ സുഡാനില്‍ നിന്നൊഴിപ്പിക്കാനുള്ള ദൗത്യത്തിന് മേല്‍നോട്ടം വഹിക്കാന്‍ കേന്ദ്ര വിദേശകാര്യ സഹമന്ത്രി വി മുരളീധരന്‍ ജിദ്ദയിലെത്തി. ഓപ്പറേഷന്‍ കാവേരിക്ക് നേതൃത്വം നല്‍കാന്‍ വി.മുരളീധരനെ ചുമതലപ്പെടുത്തിയതായി പ്രധാനമന്ത്രി കഴിഞ്ഞ ദിവസം അറിയിച്ചിരുന്നു. സൗദി വഴി വിമാനത്തിലും കപ്പലിലുമായി ഇന്ത്യക്കാരെ നാട്ടിലെത്തിക്കാനാണ് ശ്രമമെന്ന് കേന്ദ്രമന്ത്രി പ്രതികരിച്ചു. ജിദ്ദയിലെ കണ്‍ട്രോള്‍ റൂം സന്ദര്‍ശിച്ച മന്ത്രി ഉന്നത ഉദ്യോഗസ്ഥരുമായും കൂടിക്കാഴ്ച നടത്തി. പോര്‍ട്ട് സുഡാനിലും ജിദ്ദയിലും ആവശ്യമായ അടിസ്ഥാന സൗകര്യങ്ങള്‍ ക്രമീകരിച്ചു നടത്തിതായും മന്ത്രി അറിയിച്ചു. ദൗത്യത്തിന്റെ ഭാഗമായി 278 പേര്‍ ജിദ്ദയിലേക്ക് പുറപ്പെട്ടതായാണ് റിപ്പോര്‍ട്ട്. ഐഎന്‍എസ് സുമേധയിലാണ് പോര്‍ട്ട് സുഡാനില്‍നിന്നും സംഘം തിരിച്ചത്.